Linggo, day off ng aming mga kasambahay. Wala rin masyadong gawaing bahay maliban sa pagluluto at pag-aalaga ng aming baby. Hindi na kami lumabas para mamasyal o mamalengke. Pinalipas na lang namin ng Partner ko ang araw sa panunuod ng DVD at kwentuhan over a cup of coffee at yosi. Samu’t saring topiko ang kwentuhan namin, mula sa planong mamili ng mga tanim para sa garden, diapers ng baby, hanggang mahagip ang usaping blogging. Kapag usaping IT na si partner ko ang aking Wizard at ako ang kanyang masugid na apprentice.
Nag-umpisa kwentuhan namin hinggil sa blogs nang tinanong ko siya, “sa tingin mo ano kaya ang naghihikayat sa mga tao na mag-blog?”. Parehas kami nang pagtingin na karamihan sa mga nag-bablog ay mga taong naghahanap lang ng alternative outlet para daluyan ng creative juices nila. Makapag-interact sa mundo sa pamamagitan ng pag-ambag ng kahit anong nasa isip at saloobin nila. Parang isang therapeutic activity, mailabas mo pagtingin mo sa isang bagay o di kaya iyong karanasan sa buhay at malaman din kung anong reaction ng mga mambabasa hinggil dito. After all, may totoong buhay ka namang haharapin pagkatapos mong mag-blog.
“Ang hindi ko lang kasi maintindihan bakit may ibang tao na para bang ginagawang career ang pagba-blog, na para bang ito na ang buhay nila.”
Patawa akong sinagot ng parner ko, “Meron ngang ganyan at totoong career na nga nila ang blog”. Dagdag pa nya, “alam mo bang pwede kang kumita sa blog?”
“Ano?” muntik akong masamid sa iniinom kong kape.”Papaano?”
Eto na’t nagbigay na ng lecture ang aking mahal na partner. “Ang blog ay isang makabagong publishing medium, talo pa nito ang desktop at offset publishing. Dahil sa blog hanggat may internet may constant readers ka. Anytime kahit sino puedeng silipin at basahin ang mga pinublish mo.”
“So, anong connection nito?” tanong ignoramos ko.
“Ang internet ang nag-introduce ng mga makabagong paraan para mas mapabilis ang takbo ng commerce, marketing at advertisement,” patuloy nya. “You the consumer get the product shoved right in your face. Pagbukas mo pa lang ng browser mo babahain ka na ng mga advertisements.”
“Hmmm, so anong connection?” pagka-ignoramos ko lang talaga.
“Take Yahoo, for instance. Hindi ka ba nagtataka kung paano sila kumikita gayong libre naman ang ipinamimigay nilang email accounts?” Honga ano. “Sa advertisement at sponsors sila kumikita, binabayaran sila for displaying ads. So habang dumarami ang nagpaparehistro sa kanila lumalaki kita nila. Some advertisers kasi, imbes na gumasto ng bilyon-bilyon para sa one-shot ad in another medium, say television, thought it better na magbayad na lang sa mga gaya ng Yahoo—mas nakamura na sila, mas malawak pa masasaklaw ng advertisement nila.”
“Timpla muna ulit ako ng kape bago mo ituloy. Hmmm, interesting na to pagpunta mo na sa blogs.” Pagbalik ko may bagong kape na’t bagong sindi na akong yosi. “O game.”
“Same concept kung gusto mong kumita sa blog,” dugtong nya sabay higop sa kapeng tinimpla ko.
“Papaano?” pangungulit ko ulit.
“Pwede kang maglagay ng ads sa blog mo. You just have to sign up with one, gaya ng Google Adsense at iba pa, o magpa-affiliate link ka sa mga marketing websites… bawat click ng mga readers mo sa ads na to meron kang commission. Kahit hits o impression lang, o pagbukas mo pa lang sa page ng blog na nandun ang adds may kita na ang may ari ng blog.”
“Wow,” ang tangi kong nasabi. “Ibig sabihin, bawa’t bisita ko sa blog na may ad, kumikita na may-ari nun? Tsaka dollars pa ang kita?” Pastilan! “So anong gagawin para kumita nang malaki?”
“Simple lang,” dagdag ng partner ko, “ayusin mo blog mo at skills sa pagsusulat, gumawa ka nang mga critical o controversial na commentaries sa iba’t ibang issues at topics para may kiliti at marami ang reaction, at mag-maintain ka nang sandamukal na masugid na readers para may regular hits ka. Importante sa mga blogs na ito ang traffic, mas marami mas masaya.”
“Hmmm, ah kung ganun,” dagdag ko, “kung mas popular ka dahil sa dami ng bumibisita sa blog mo, mas malaki ang kikitain mo”. Lumalaro na ang malikot kong isipan. “At dahil ganito, iba’t ibang gimmicks ang maaring pakuluin kaya kung bakit nagiging parang showbiz na ang bloggosphere. Kaliwa kanang intrigahan at gamitan kasi the more may kontrobersya, the more na maraming interesadong makiusyoso, the more na may kumikita!” Parang telenovela, maienganyo kang babalikbalikan ang mga blogs na ito dahil gusto mong malaman ang kasunod na kabanata.
Ah, hindi malayong sa kabila nang mga akala mo’y mga blogs na may integridad at kredibilidad at kunwa’y purveyor ng mga virtues in blogging, maaaring sa likod nito ay isang malaking racket lang din pala… maaari, maaari. Tsk, kaya pala ang iba ginawa nang career ang blogging.
“O baka naman maisipan mo pang i-career ang blogging?” pabirong tanong ni partner. “For more info tungkol dyan, i-google mo na lang ‘earning from blogs or blogging for profit’.”
“Hindi na,” sagot ko, “buti pa ang i-google ko na lang e si Super Chona… yung blog na walang himala. Buti pa yun, enjoy ka.”
“Hahahaha,” sabay kaming napatawa.
Haay kinabuhi! “o siya, ubos na kape ko, magsasaing na muna ako,” sabi ko, sabay patay sa yosi.
Other Stories
Recent Comments